ALEM

Datas e horarios definitivos da convocatoria extraordinaria

2011-11-09T20:14:00.000+01:00

Estas son as datas, horarios e aulas definitivas da convocatoria especial de exames de primeiro de licenciatura. Lembramos que para presentarse é preciso ter estado matriculado nelas no ano 2010/2011 e que a nota conta como a convocatoria de setembro pasado, xa que é unha repesca dela.

Histoloxía | 14-11-2011 | 09h00 | Aula 1
Bioquímica I | 16-11-2011 | 09h00 | Aula 1
Historia Medicina | 21-11-2011 | 09h00 | Aula 1
Citoloxía, Embrioloxía | 23-11-2011 | 09h00 | Aula 1
Biofísica | 25-11-2011 | 16h00 | Aulas 4 e 5
Fisioloxía Xeral | 28-11-2011 | 09h00 | Aula 1
Bioestatística | 29-11-2011 | 09h00 | Aula 1
Anatomia I | 30-11-2011 | 12h00 | Aulas 1 e 6

A información provén directamente do decanato e pode verse na web da USC. Tamén engadín as datas ao noso calendario en liña: http://ir.gl/calendariomedicina

Saudiña!

Datas provisionais da convocatoria extraordinaria

2011-10-29T16:19:00.001+02:00

Estas son as datas da convocatoria especial de exames de primeiro de licenciatura. Lembramos que para presentarse é preciso ter estado matriculado nelas no ano 2010/2011 e que a nota conta como a convocatoria de setembro pasado, xa que é unha repesca dela.

As datas son provisionais ao faltar a aceptación do decanato e o tema das salas de aulas e as horas dispoñíbeis. Todo iso depende da secretaría, non podendo facer nada os estudantes.

Datas provisionais:

Histoloxía I: 14/11/2011
Bioquímica I: 16/11/2011
Historia: 21/11/2011
Citoloxía: 23/11/2011
Biofísica: 25/11/2011
Fisioloxía I: 28/11/2011
Bioestatística: 29/11/2011
Anatomía I: 30/11/2011

A información e o esforzo por cadrar as datas conforme o votado por correo-e temos que agradecerllo a Cristian Vale Varela, delegado de 3º grupo II. Moitísimas grazas!

Saudiña!

Miguel López e Ángel Carracedo na TVG

2011-10-23T14:20:00.000+02:00

Recuperación especial das materias en extinción

2011-10-19T22:45:00.000+02:00

Esta é a información de que dispomos (facilitada pola UXA):

Para presentarse á recuperación das materias en proceso de extinción (que son apenas as de 1º de licenciatura), que terá lugar ao longo do que resta de 2011, o único requisito é terse matriculado delas no ano pasado (2010/2011, ao que corresponde esta repesca). Non é preciso facer ningún novo trámite administrativo.

Aquela xente que se presente á recuperación pode matricularse ou non da materia para o presente ano. Se vos matriculades e aprobades a repesca devolverásevos o importe da matrícula; se non vos matriculades e suspendedes a repesca podédesvos matricular no segundo período de modificación de matrícula, en marzo.

Para opinar sobre a data na que preferides a recuperación estanse a ocupar no blogue de 3º: http://uscmedicina.wordpress.com/2011/10/17/aviso-pendentes-en-primeiro/

Saudiña!

Presentacións das prácticas descentralizadas

2011-10-01T17:44:00.001+02:00

As presentacións para as prácticas fóra de Santiago son:

CHUAC: Luns (segunda feira) día 3 ás 9h00 no Salón de actos (4º planta)
CHUVI: Luns (segunda feira) día 3 ás 10h00 no Salón de Actos (Edificio anexo ao Hospital Xeral)
CHOU: Luns (segunda feira) día 3 ás 8h30 na Secretaría de docencia (5ª planta edificio cirúrxico no corredor de habitacións para as gardas)
HULA: Luns (segunda feira) día 3 ás 11h30 na Aula 305 (3ª planta ao lado da Dirección)

Alén disto, continúan a ser precisos delegados de hospital para 4º no CHUAC, 4º no CHUVI, e 6º no HULA. É moi importante contar con eles.

Saudiña!

Novas informacións sobre as prácticas descentralizadas

2011-09-27T15:58:00.000+02:00

Boas!

Hoxe a nosa compañeira Montse reuniuse co Decano que a informou do seguinte:

En Vigo o tema do coordinador está arranxado e continuará como tal o Dr. Martínez Vázquez.
Xa tiveron unha reunión o Decano e o Comisionado de Ciencias da Saúde da USC con docencia de Ourense. Mañá vana ter con docencia de Lugo.
Na quinta feira (xoves) haberá unha reunión entre xefes de departamento e docencia dos hospitais para intercambiaren informacióin (programa, criterios de avaliación, etc.).

Entón, agardamos que sexta feira (venres) poida quedar todo mais ou menos organizado para que á semana comecen as prácticas con normalidade, excepto detalles que se deban arranxar cos propios alumnos no propio hospital.

Alén disto, para facilitar a organización e a comunicación entre os estudantes e os centros son necesarios voluntarios para exercer, polo menos provisionalmente, como delegados de hospital. É precisa unha persoa por curso e hospital, de modo que pedimos aos delegados que se xa dispoñen de voluntarios para esta tarefa que nolo comuniquen (asemblealibre@gmail.com) para coodinarnos entre todos neste tema.

Só lembrar que se as prácticas nos hospitais funcionan a pesar de todas estas eivas é grazas aos estudantes que están alí, quen se organizan cos médicos para garantir que todo vaia ben. Son eles, os estudantes descentralizados, quen teñen todo o mérito.

Saudiña!

Sutuación das prácticas descentralizadas

2011-09-26T22:56:00.000+02:00

Como moitos xa saberedes, o proceso de alegacións á descentralización xa colcluíu, polo que cada estudante sabe xa cal é o seu destino. Os grupos de prácticas de Santiago están (ou deberían estar en breve) nas mans dos delegados para que os fagan públicos. Sabemos que na Coruña tamén están a traballar na organización das prácticas. Os problemas encóntranse nos hospitais de Vigo, Ourense e Lugo.

En Vigo o coordinador de docencia dimitiu por descontento coa xestión feita desde a facultade e a USC, polo que a situación está "no ar". Unha compañeira e unha delegada están a levar o tema para tentar arranxar algo esta semana.
En Lugo o coordinador asume os estudantes pese a sentirse desatendido pola facultade, mais non ten novas do decanato. Dúas compañeiras están a traballar no tema para tentar organizar as prácticas.
En Ourense estaban simplemente á espera de información de Santiago, que polo momento non chegou. Uns compañeiros están a traballar tamén na organización.

Deste modo, a situación resúmese en que en Vigo, Lugo e Ourense somos os estudantes quen estamos a mediar entre facultade e hospital, quen temos que facilitar a información necesaria para a organización das prácticas. E todo isto a menos dunha semana para o comezo do curso.

Por varias frentes estamos a informar o decanato do que acontece (por se non eran conscientes...). Agardamos a súa máxima colaboración para facer nunha semana o traballo que debía estar feito moito antes.

Non vos asustedes nin desesperedes (porque indignados xa habedes de estar, con toda a razón do mundo). Nós estamos a facer todo o posíbel por arranxar o tema o antes posíbel.

Manterémosvos informados. Para maximizar o fluxo de información pregamos aos delegados que difundan esta información polos seus medios habituais (correo, blogues...).

Saudiña!

Listas definitivas de descentralizados

2011-09-16T15:37:00.000+02:00

Pois ben, xa sabemos quen está e quen non descentralizado. Saíu hoxe a resolución das alegacións, que podedes ver na web da USC ou no seguinte .pdf:

Resultados reclamacións descentralización docencia práctica

Parabéns a aquelas persoas a que admitiron as reclamacións, e síntoo por aquelas que non.

Saudiña!

As listas de descentralizados sairán a partir do 16

2011-09-13T19:30:00.000+02:00

Segundo un comentario que deixou no noso blogue un estudante baixo a alcuña Lago:

Le he mandado un correo al secretario del decanato para saber cuando salían las nuevas listas de la descentralización porque he reclamado,y me dicen que salen como pronto el viernes que ese día tienen la reunión,con lo que nos dejan 3 días como mucho para arreglar los grupos de practicas...en fin.por si a alguien le interesa

Entón, até o día 16 non se sabe nada. E iso como moi cedo, que non me estrañaría que o deixasen para despois do fin de semana e saísen o día 19. E temos que ter en conta que os delegados teñen que entregar os grupos o día 20 como moi tarde.

Cousas do decanato...

Actualización: Lago déixanos máis información:

E outra cousa que me dixo o tipo é que en principio as novas listas estaran expostas na facultade e que SE PODEN na paxina web da facultade.
Tamen comentar que contestei dicindo que si saían as listas o 16 ou mais tarde só imos ter tres días como maximo para facer os grupos de prácticas os que estemos "no aire",e el contestou que intentaría falar co decano para pospoñer a reunión do 20 e ter mais tempo para arranxar os grupos.Un saúdo

Últimas novas

2011-09-12T13:43:00.003+02:00

Estamos a piques de comezar o novo ano (2º xa comeza mañá) e continúan a chegar novas importantes para este ano:

O número de créditos para pasar de ciclo pasou de 75% a 50%. É dicir, para poder matricularse en materias do segundo ciclo é preciso ter aprobados 104,5 créditos troncais (antes eran 156).

Para as materias en proceso de extinción sen dereito a docencia, dispomos de 4 convocatorias en 2 anos (isto é, o primeiro ano en que non hai docencia e o seguinte). Temos dereito a esas 4 convocatorias sen importar o número de convocatorias que xa teñamos realizadas (é dicir, aínda que xa esteamos na sexta convocatoria, podemos ir ás 4 convocatorias na mesma). Á parte, a convocatoria de setembro dará dereito a dúas oportunidades de exame, o exame ordinario mais un exame de recuperación para os que suspendan o exame ordinario. No caso de suspender o exame ordinario e aprobar na recuperación, a cualificación desa convocatoria será a da recuperación. O calendario de recuperacións ha de fixarse durante o que resta de 2011 e ha de facerse contando co criterio dos delegados.

No próximo día 20 de setembro haberá unha reunión de delegados co vicedecano da docencia clínica (prof. Carreira) para organizar os grupos e o calendario exacto de prácticas en todos os hospitais acreditados. A partir desa data han de coñecerse todos os datos e datas das prácticas.

A USC decidiu suspender o servizo de bus gratuíto para as prácticas na Coruña e Vigo alegando a súa baixa utilización. Contra o que algúns medios din que dixo o sr. Decano, queremos deixar claro que esa foi unha decisión unilateral que en ningún momento contou co apoio nin coñecemento dos representantes de estudantes. Os representantes de estudantes, conforme ao votado por todo o estudantado na asemblea, solicitamos unha mellora do transporte e dos seus horarios, adecuándoo ás necesidades dos estudantes. E non só non se mellorou o servizo como pediamos, senón que foi eliminado. Os representantes de estudantes estamos indignados ao sabermos da nova pola prensa e agardamos ter proximamente unha aclaración por parte da equipa decanal e/ou reitoral.

Horarios para o ano 2011-2012

2011-09-01T21:52:00.001+02:00

Chegou o día 1 de setembro e xa temos que comezar a pensar na volta ao cole. Para irdes xa organizando este novo ano, desde aquí informámosvos de como vai a cousa. Antes de nada, para saber os períodos de exames, de vacacións e os días festivos, podedes ver o calendario da USC para o ano 2011-2012.

Estudantes de 1º (Grao)

Horario 1º Grao Medicina - Grupo A - 1º semestre

Horario 1º Grao Medicina - Grupo A - 2º semestre

Horario 1º Grao Medicina - Grupo B - 1º semestre

Horario 1º Grao Medicina - Grupo B - 2º semestre

Horario 1º Grao Medicina - Grupo C - 1º semestre

Horario 1º Grao Medicina - Grupo C - 2º semestre

Horario 1º Grao Medicina - Grupo D - 1º semestre

Horario 1º Grao Medicina - Grupo D - 2º semestre

Comezan as aulas no día 19 de setembro.

Estudantes de 2º (Grao)

Horario 2º Grao Medicina - Grupo A - 1º semestre

Horario 2º Grao Medicina - Grupo A - 2º semestre

Horario 2º Grao Medicina - Grupo B - 1º semestre

Horario 2º Grao Medicina - Grupo B - 2º semestre

Horario 2º Grao Medicina - Grupo C - 1º semestre

Horario 2º Grao Medicina - Grupo C - 2º semestre

Horario 2º Grao Medicina - Grupo D - 1º semestre

Horario 2º Grao Medicina - Grupo D - 2º semestre

Horario 2º Grao Medicina - Optativas Grupo AB - 1º semestre

Horario 2º Grao Medicina - Optativas Grupo AB - 2º semestre

Horario 2º Grao Medicina - Optativas Grupo CD - 1º semestre

Horario 2º Grao Medicina - Optativas Grupo CD - 2º semestre

Comezan as aulas no día 13 de setembro.

Estudantes de 3º (Licenciatura)

Ver horario de 3º

Comezan as aulas no día 3 de outubro.

O estudantado de 3º tamén ten que ver se ten pensado pasar ao grao ou non para o ano, conforme o plano do decano. Para máis información sobre este tema, vede os documentos publicados na web da USC.

Estudantes de 4º (Licenciatura)

Ver horario de 4º

Comezan as aulas no día 3 de outubro. Ao igual que o ano pasado, o grupo I comeza con práctica e o grupo II comeza con teoría.

Estudantes de 5º (Licenciatura)

Ver horario de 5º

Comezan as aulas no día 3 de outubro. Ao igual que o ano pasado, o grupo I comeza con práctica e o grupo II comeza con teoría.

Estudantes de 6º (Licenciatura)

Ver horario de 6º

Comezan as aulas no día 3 de outubro. Ao igual que o ano pasado, o grupo I comeza con práctica e o grupo II comeza con teoría.

Horario de exames

Ver horario de exames

Estes son os horarios dos exames para todos os niveis e planos de estudos. Só teñen un erro, que o exame de Bases Psicolóxicas de 2º de licenciatura figura o día 1 de xaneiro cando en realidade é o 1 de febreiro.

P.S: Dixérasenos que o grupo que no ano pasado comezara con prácticas comezaría este ano con teoría neste e viceversa. Non obstante, este ano aprobouse que o comezase o grupo I con práctica, como o ano pasado. Non sabemos se foi un erro ou que foi o que aconteceu, mais así é como se aprobou.

Actualización 12/09/2011: Engadidos os horarios de 1º e 2º do Grao en Medicina.

Saudiña!

Lista de descentralizados

2011-08-03T13:21:00.003+02:00

Xa saíu a lista de descentralizados (con data do 2 de agosto), que se pode encontrar en .pdf na web da USC na seguinte ligazón:

http://www.usc.es/gl/centros/medodo/modules/news/news_0001.html

As reclamacións faranse ao decano entre os días 1 e 9 de setembro, e só se aceptarán se entran dentro dos criterios de exclusión mencionados no documento.

Nós sempre requirimos ter as listaxes definitivas antes do verán, mais ao final sacaron as provisionais agora en agosto e as reclamacións serán na época dos exames de setembro. E non se sabe canto demorarán en saír as listaxes definitivas. En fin, un problema máis para os estudantes que até setembro, non están certos de onde van acabar.

Sobre o tema dos buses... non hai nada. Decanato e reitorado pasan a bóla un ao outro. Con todo, desde a Liga ( Liga Estudantil Galega Medicina-Odontoloxía) fixeron un formulario para valorar a xente interesada en ter un bus e así poder presionar para que o poñan. Preenchede o formulario, por favor, é só un segundo:

https://spreadsheets.google.com/spreadsheet/viewform?formkey=dDFwNVJ1TnRnR0FmRW5BN0tJMWdZU2c6MQ&ifq

Resumo da reunión da descentralización

2011-07-22T00:01:00.002+02:00

Na reunión que tivo lugar esta tarde con parte da equipa decanal, estaban presentes todos os membros da mesma e tres representantes de estudantes: Anduriña López (3º curso), Adrián Mosquera (4º curso) e Montse Fdez. (5º curso). Estes tres estudantes pasaron a formar parte da Comisión de Descentralización debido aá excepcionalidade de que había que proseguir coas negociacións durante este período non lectivo e ante a imposibilidade de asistiren o resto dos membros ou outros representantes da Xunta de Facultade.

Nesta reunión negociouse o acordo dos compañeiros que estarán descentralizados durante o curso 2011-2012. Os puntos que se trataron son os indicados a seguir:

1. A selección dos compañeiros que estarán descentralizados no próximo ano farase na seguinte orde:

Voluntarios. O número destes é insuficiente para cubrir as prazas exixidas para o CHUAC e o CHUVI (50 por complexo hospitalar e curso). Por tanto, as prazas restantes serán repartidas entre xente que non se ofreceu voluntaria (é dicir, obrigados) conforme os seguintes puntos.

Compañeiros que cheguen a Santiago a través dun intercambio. Destes, escolleranse primeiro as persoas que só vaian a realizar materias clínicas, e a seguir iranse escollendo segundo teñan de menos a máis carga teórica.

Compañeiros con domicilio familiar nas cidades da Coruña e Vigo (Só no caso de non se encheren as prazas cos dous puntos anteriores). No caso de non chegaren nin con estes, teranse en conta os concellos próximos que gocen dun bo sistema de transporte ás urbes que facilite a dispoñibilidade para se descentralizar.

2. A respecto do sistema de transporte para a descentralización ás cidades de Vigo e A Coruña (isto é, os buses de Santiago ás cidades), até agora non hai noticias por parte do reitorado.

3. A respecto dos voluntarios descentralizados ás cidades de Lugo e Ourense, non houbo ningún matiz, descentralizándose unicamente os voluntarios.

4. Elimínase o acordo proposto nas negociacións de hai dous anos de que os compañeiros que estén descentralizados durante un ano terían o dereito de facer as prácticas clínicas en Santiago durante o seguinte. É dicir, se fuches descentralizado obrigado un ano podes repetir outro máis.

En resumo, a proposta estudantil inicial (modelo C) foi ignorada e teremos o mesmo sistema de hai dous anos mais sen buses. As protestas que fixemos os estudantes foron insuficientes e ao final non logramos o sistema polo que loitabamos. Máis un ano, continuará a haber estudantes que vaian obrigados.

Descentralización e paso a Grao

2011-07-11T19:35:00.000+02:00

O pouco que puidemos saber sobre descentralización e paso a grao é:

- Xa están dispoñibles na web da facultade as pasarelas que se ofertan para aqueles que desexen pasarse a grao. Basicamente consisten en que o próximo ano os interesados poderán escoller, alén das materias do seu ano, algunha de cursos superiores para poder así adaptar o seu currículo de materias co equivalente do Grao e pasar a Grao no seguinte ano.

- O modelo a seguir o próximo ano é o actual (mensual) e descoñecemos até que punto realmente se tentou desde o decanato cadrar as aulas a horarios para poder establecer a aposta estudantil (o modelo C).

- Os hospitais en que se poderán facer prácticas o próximo curso serán os de Santiago, A Coruña, Vigo, Ourense e Lugo e estarán organizadas pola facultade e o centro. O decanato ten un compromiso coa Xunta de que non se farán prácticas extraoficiais en ningún outro hospital.

- Polo momento desde o decanato non nos dan información sobre o transporte en autobús á Coruña e a Vigo, pois din non ter novas do reitorado, que é desde onde se realizan as xestións (tampouco sabemos se realmente se interesaron polo tema...).

- O número de voluntarios non chega aos 50 necesarios en ningún curso (aínda que o número é flexíbel) polo que, pese ao falado previamente cando os representantes de estudantes advertimos de que isto iría acontecer se non se implantaba o modelo C, fíxose caso omiso das nosas advertencias de que non queriamos estudantes obrigados. O decanato formula a necesidade de facer un sorteo ou de estabelecer un sistema para "asignar" (é dicir, obrigar) as prazas sobrantes até un total de 30-50 (nunca se nos di un número exacto...).

Todo o exposto anteriormente será aprobado nunha Xunta de facultade a celebrar o próximo venres 15 de xullo ás 13:00 no salón de actos da facultade, polo que pregamos a asistencia de todos os representantes de estudantes.

Tamén se algún outro estudante desexa asistir como ouvinte pode dirixirse ao decanato da facultade ou a algún dos membros da equipa decanal e solicitalo.

Sentimos que a situación sexa a que é, fixemos todo o que puidemos e sempre fomos moi claros transmitindo as peticións básicas dos compañeiros. Mais pese ás presións colectivas e ás nosas advertencias de que o que se nos ofrecía non facía mais que empeorar a situación dos estudantes, desde a facultade continúase a actuar de costas ao estudantado coa tolerancia do reitorado. A estas alturas, rematado o curso e con todos dispersos nas súas casas, os representantes de estudantes temos pouco máis que facer que votar na Xunta de Facultade, onde somos minoría e apenas contamos con apoio de algúns profesores que se preocupan por coñecer e mellorar a nosa situación.

Saudiña!

Novas máis ou menos oficiais da descentralización

2011-06-14T23:41:00.002+02:00

O paso a grao voluntario aprázase até o ano 12/13 (isto é, dentro de dous anos) para telo todo ben preparado e debidamente informado. [Ver nova na prensa: http://www.europapress.es/salud/politica-sanit...4160443.html]

Para a descentralización, polo que sabemos nun principio ha de continuarse co modelo mensual (o actual) por problemas de dispoñibilidade de aulas para os períodos en que todos teriamos teoría en Santiago.

Nun principio, en 4º farían as prácticas fóra de Santiago só os voluntarios, a incógnita é que ocorrerá con 5º e 6º, pois os voluntarios son escasos. Á parte, descoñecemos que nivel de organización hai para os hospitais de Lugo e Ourense.

Polo momento non sabemos nada mais, isto é o pouco que podemos saber a pesar da nosa insistencia...

Así que teñamos máis información, esperamos que durante esta semana, dirémosvolo. Lembramos que este tipo de informacións urxentes envíanse por correo así que se saben e tárdase un pouco en publicar no blogue. Se queres unirte á lista de correo envía unha mensaxe co teu nome e curso a asemblealibre@gmail.com

Aula de Cardioloxía

2011-06-03T18:06:00.000+02:00

Vandalismo na aula de Xinecoloxía

2011-06-01T18:06:00.001+02:00

Hai xente que ten a capacidade cerebral dun escaravello da pataca.

Con motivo do exame práctico de Clínica Obstétrica e Xinecolóxica, a sala de Xinecoloxía do hospital estaba aberta para que os estudantes puidésemos estudar coas maquetas. Pois ben, nestes días apareceron un boneco cortado polo pescozo, a pantalla do computador escrita con tipp-ex e os rexistros cardiotocográficos rechados. E hoxe, como novidade, roubaron multitude de colos de útero e úteros.

Estes manequíns en que practicamos son realmente caros, e aínda así o prof. Macía permítenos estudar con eles para o exame práctico. Pois ben, agora o profesor está anoxado, con razón, e pagarano aqueles que vaian facer o exame a partir de agora.

Se aínda lle resta algo de decencia, aquela ou aquelas persoas que cometesen semellante estupidez deberían asumilo e ir onde o prof. Macía pedir desculpas. Creo que somos todos adultos responsábeis e debemos ter conta das nosas accións.

Prácticas de verán

2011-05-18T22:38:00.000+02:00

Xa foi publicada a convocatoria das Prácticas clínicas en período non lectivo na web da facultade. Nela podedes ler a convocatoria, coñecer a oferta de prazas do SERGAS e descargar/cubrir o formulario de solicitude. A ligazón está a seguir:

http://www.usc.es/gl/centros/medodo/modules/news/news_0002.html

O prazo de solicitude termina no 3 de xuño. Os créditos concedidos este ano por cada período (xullo, agosto, setembro) son 7,5. Deberase entregar unha memoria de 5-10 follas ao titor das prácticas unha vez acabadas.

O máximo de créditos totais que se poden facer en toda a carreira por Prácticas clínicas en período non lectivo é de 15. Aqueles que ao sumar os créditos destas prácticas ultrapasen os 15 créditos máximos poderán matricularse igualmente e terán que pagalos, mais só contarán no expediente os que resten para o tope de 15 créditos. Sentímolo, mais este tope está blindado polo actual plano de estudos e non se pode alterar.

Os bolseiros do Ministerio da Educación están exentos do pagamento de matrícula e, por tanto, non teñen pagar o prezo dos créditos das prácticas de verán.

Saudiña!

Día das Letras Galegas

2011-05-17T12:39:00.000+02:00

Para celebrar o día das Letras Galegas, fai un regalo ao mundo coa túa versión preferida da canción Ti es dos meus. Podes encontrar todos os vídeos neste canal do Youtube: http://ir.gl/agasallo

NO DÍA DAS LETRAS GALEGAS ENVÍA POR INTERNET ESTA CANCIÓN PARA QUE SE ESCOITE O GALEGO EN TODO O MUNDO: http://agasallo.tk/ Son distintas versións dunha mesma partitura que se irán recibindo até o día 17.

O día 17 de maio ESCOLLE A VERSIÓN QUE PREFIRAS de entre todas as recibidas e envíaa aos amigos de todo o mundo para que a fagan escoitar nos lugares onde viven. A proposta non é facer spam (envíos masivos indiscriminados) senón ofrecer un agasallo no día das Letras Galegas a quen o saiba apreciar. Quen reciba o correo e escoite a canción compartirá un xesto repetido milleiros de veces ao longo de milleiros de quilómetros.

SE QUERES FACER A TÚA PROPIA VERSIÓN, colle a partitura de http://pdfcast.org/pdf/ti-es-dos-meus e despois grávate coa primeira cámara que atopes (calquera vale cando hai cariño) e comparte o vídeo con todos.

AQUÍ http://www.youtube.com/user/Agasalloparaomundo iremos engadindo as achegas que se reciban.

Formulario para ser voluntario á descentralización

2011-05-17T00:58:00.000+02:00

Como se falara na reunión co decano e o comisionado, estase a facer unha listaxe coa xente voluntaria a se descentralizar. Para tal creouse un formulario na Internet onde te apuntar como voluntaria e baixo cales condicións.

Ollo! Se non te ofreces voluntaria baixo ningunha condición non tes que facer o formulario!

INSTRUCIÓNS
(tiradas do blogue oficial: http://descentralizacions.wordpress.com/ )

Este blogue ábrese para todos aqueles e todas aquelas que o ano que vén estarán en 4º, 5º ou 6º de Medicina na Universidade de Santiago de Compostela. Créase para recoller os datos de todas as persoas que se ofrezan a:

1) No caso de se manter o modelo actual de descentralización mensual, ir a Vigo, á Coruña, Ourense (sen buses) ou Lugo (sen buses) en todos os meses de prácticas.

2) En caso de se instaurar o modelo C, pasar os dous períodos de prácticas, e non só o período que pasaríamos todos fóra, en Vigo, na Coruña, Ourense (sen buses) ou Lugo (sen buses).

3) Pasar ao plano de Grao segundo o modelo que presentará publicamente ao estudantado interesado o Decano na vindeira segunda feira (luns) 23 ás 19.30 no Salón de Actos da Facultade.

Aqueles que non se ofrezan a ningunha das opcións non teñen que facer nada.

Para accederes ao formulario, clica na seguinte ligazón:

ACCEDER AO FORMULARIO

Conclusións da reunión co decano e o comisionado

2011-05-13T20:56:00.000+02:00

Como consecuencia inmediata da manifestación do día 11, hoxe tivo lugar a reunión do estudantado de Medicina co prof. Gestal (decano) e o prof. Macía (comisionado de ciencias da saúde da USC). Antes de máis, agradecer a todos os estudantes que fosen á reunión mesmo sendo nunha sexta feira (venres) á tarde, véspera dunha ponte e cun exame adiantado na segunda feira (luns).

POSICIÓN DO REITORADO

O reitorado, por boca do prof. Macía, mostrouse favorábel ao modelo C. En primeiro lugar dixo que a principal vantaxe sería o aforro económico, pois co modelo C o período de contratación dos buses sería menor. Isto é porque o último mes antes de cada época de exames todo o estudantado fica en Santiago, e ese tempo non teñen que pagar os buses. Non obstante marcou tres eivas fundamentais: a dificultade organizativa, a escaseza de salas de aulas e a negativa de Vigo e A Coruña.

Acerca dos buses, Macía dixo que habería, mais que non estaba certo de se sería o reitorado quen o financiaría. Alegando o mal estado das contas da Universidade, dixo que o gasto completo era inasumíbel para o reitorado, lanzando a bóla ao decanato, quen tampouco se mostrou moi disposto a correr co gasto.

Finalmente, a conclusión a que chegou foi que desde o reitorado son favorábeis ao modelo C sempre que poidan ter flexibilidade para resolver o inconveniente do espazo limitado para dar a teoría. E no caso de non poder ser viábel o modelo C continuaríase co modelo actual, tentando que fosen apenas os voluntarios ou un mínimo número de xente á que non lle importase. Os criterios de descentralización serían estudados máis adiante se se der este caso.

"Estamos estudiando los inconvenientes del modelo C e intentaremos instaurarlo. En caso de que no fuese viable se seguiría con el modelo actual" Prof. Macía

Tamén se deu un dato importante, e é que para o ano tamén se abren os complexos hospitalares de Lugo e Ourense para as prácticas. Deste xeito, os voluntarios poden escoller entre Lugo, Ourense, Vigo e A Coruña para realizaren as prácticas todo o ano. No entanto, os non-voluntarios só irían á Coruña ou a Vigo, e os buses só irían a eses dous sitios. E será imposíbel realizar as prácticas en calquera outro hospital fóra destes, nin sequera de xeito fantasma como se viña facendo.

Falou de que o máximo de estudantes que son viábeis no complexo hospitalar de Santiago de Compostela son 250 por curso. Se se conseguise que só indo os voluntarios fóra se chegase a ese número en Santiago, o resto non terían que ser descentralizados. Tamén se falou de que o número máximo que aceptan Vigo e A Coruña son 50 por curso, e Lugo e Ourense 30 por curso. Non habería un mínimo obrigatorio en cada hospital, sempre que se chegase a que houbese menos de 250 estudantes por curso en Santiago.

Pediu tamén que os representantes de estudantes fixesen un inquérito ao estudantado para ver o número de voluntarios que habería para o ano. Isto realizarase na semana que vén, onde previsibelmente se repartirán cuestionarios para que a xente responda se iría descentralizada ou non, a que destino e baixo que condicións (só co modelo C, só se houber buses...).

E, a respecto de Boloña, Macía insistiu en que desde a reitoría nin poden nin queren obrigar a ninguén a pasar ao grao. De feito, no reitorado non manexan esa opción.

POSICIÓN DO DECANATO

O prof. Gestal, decano da facultade de Medicina, dixo en primeiro lugar que se reuniría na segunda feira (luns) cos representantes de estudantes para facer o inquérito que mostre o número de voluntarios para o ano.

Na súa intervención, reiterou a idea de querer pasar os estudantes ao grao. Dixo que quería dar a opción a quen así o desexar, e que se reuniría con todos os cursos para expor a súa idea. A proposta é que os estudantes que están en 4º fagan un 5º de grao, cos 60 créditos ECTS precisos para a bolsa do Ministerio, onde se condensase a teoría de 5º e 6º. Así, no seu 6º ano, terían apenas práctica. E dixo que estudarían dar a opción tamén ao actual 3º, que podería pasar de xeito opcional a un 4º de grao, aínda que neste caso non explicou como irían cadrar os créditos para a bolsa do ministerio.

Explicou que este paso a grao sería voluntario e para aqueles estudantes que quixesen, facendo un grupo á parte. Porén, non observou que o número de voluntarios a pasar non chegaría ao mínimo suficiente para facer un grupo separado, que os horarios serían moi difíciles de compaxinar e que deste xeito non se chegará a desconxestionar o suficiente o hospital como para deter a descentralización. O decano ten a idea de que o paso a Boloña sería amplamente aceptado polo estudantado, a pesar de expresarlle reiteradamente que non é así.

Polo resto, non falou nada de estar a favor ou contra o modelo C, limitouse a teimar na idea de pasar ao grao.

CONCLUSIÓN

O reitorado está a favor do modelo C, mais dentro dese modelo quere mirar pola opción máis económica para eles, dado o actual estado económico da USC. A Xunta teima en querer mandar xente a Vigo e á Coruña, cousa apoiada polas respectivas Universidades e os dirixentes de ambas as cidades, que o usan como arma política. E o decanato mantense indeterminado, no limbo, teimando nun paso a Boloña que ninguén quere.

Resta entón esperar á realización e resultado dese inquérito para saber o número de voluntarios e ver cal será a posición final do decanato. Até a semana non hai nada firme, mais isto ten boa traza.

Continuaremos a informar!

Reunión do estudantado co decano e o comisionado (Mensaxe recuperada)

2011-05-12T19:52:00.013+02:00

Por un erro na manutención do servizo, a mensaxe e os comentarios escritos onte foron eliminados. Recupero aquí a mensaxe do blogue desaparecida.

Como resultado da manifestación de onte, haberá mañá unha reunión con todo o estudantado de Medicina onde o prof. Gestal (decano) e o prof. Macía (comisionado de ciencias da saúde da USC) exporán a súa proposta definitiva para a organización da docencia de todos os niveis. Por tanto:

REUNIÓN DE TODO O ESTUDANTADO CO

DECANO E O COMISIONADO DE CIENCIAS DA SAÚDE

Mañá (13 de maio) ás 17h30 na Facultade de Medicina

Somos conscientes de que é unha má data e todos queremos ir de ponte o antes posíbel. Mais se alegamos nas nosas protestas o apuro dunha resolución, non podemos adiar a reunión e así darlles a escusa de que non nos interesamos. É MOI IMPORTANTE ASISTIRDES ESTUDANTES DE TODOS OS CURSOS, pois vai ser explicada de primeira man a proposta da Universidade para todos os niveis e alí darán resposta e poderedes opinar directamente cos máximos encargados deste tema.

Agardamos a maior asistencia posíbel. É un momento chave no proceso e o estudantado todo debe ficar unido.

Saudiña!

Concentración de Batas Brancas

2011-05-10T20:10:00.000+02:00

Concentración de Batas Brancas

BATAS Á RÚA, A PROTESTA CONTINÚA

Mañá (11 de maio) ás 13h

na Facultade de Medicina e no Reitorado da USC

Foto da concentración de Batas Brancas do 7/5/2009

COMUNICADO DO ESTUDANTADO DE MEDICINA

Desde a Asemblea Libre de Estudante de Medicina (ALEM) en representación do estudantado da Facultade de Medicina da USC, reunidos en asemblea o día 5 de maio de 2011, decidimos PÓR NO SEU COÑECEMENTO AS SEGUINTES CONSIDERACIÓNS:

Os estudantes hai xa semanas que presentamos á equipa decanal a nosa proposta de organización da docencia para o segundo ciclo da licenciatura, que inclúe a descentralización da metade da docencia práctica (ou da súa totalidade se o estudante así o desexar) aos complexos hospitalarios da Coruña e Vigo para todos os estudantes; así como a outros complexos hospitalarios se os estudantes o solicitaren. Pola contra, cremos que a docencia teórica se debe impartir unicamente en Santiago de Compostela, mantendo así a homoxeneidade na formación e avaliación para todo o estudantado, sen que isto supoña unha oposición á incorporación de novos docentes provenientes doutros complexos hospitalarios, os cales poderían facer carreira docente na USC impartindo a docencia teórica en Santiago de Compostela, algo que sen dúbida sería de proveito para a calidade da nosa formación.

Como resposta á nosa proposta e sen alegar ningún inconveniente obxectivo que xustifique a negativa á aplicación da mesma, o que se nos propuxo por parte das equipas decanal e reitoral foi que os estudantes concentrasen toda a docencia teórica no 4º e 5º cursos e case toda a docencia clínica (prácticas) no 6º curso. Así realizaríase un curso unicamente práctico similar ao rotatorio da titulación de grao que xa se está a implantar e que podería realizarse en calquera dos hospitais habilitados para a realización de prácticas clínicas. Ademais, aproveitando esta reorganización de contidos, o estudante que así o desexar podería adaptarse ao grao e rematar a súa formación como graduado e máster, coas posíbeis vantaxes que isto suporía.

Como mostra de boa vontade, os representantes de estudantes estudamos esta proposta e buscamos polo miúdo vantaxes e inconvenientes da mesma e incluso tentamos introducirlle melloras que puidesen facela máis atractiva á hora de presentarlla aos nosos compañeiros. Unha vez exposta con todo detalle esta reestruturación, os estudantes entenderon unanimemente que é INASUMÍBEL pola nosa parte polos motivos, entre outros, que se especifican a continuación:

- A desmesurada carga de contidos que supón comprimir toda a teoría de 3 cursos en apenas 2, tendo en conta a grande dificultade e importancia das materias en cuestión.

- A redistribución da maioría da carga de créditos no 6º curso non permitiría aos estudantes obteren unha bolsa do Ministerio de Educación ao non alcanzaren no 4º e 5º cursos o mínimo de créditos matriculados exixidos para ser bolseiro, sendo este un elemento fundamental para que moitos estudantes poidan continuar os seus estudos.

Unha vez exposta a clara postura do estudantado en oposición á proposta defendida polas equipas decanal e reitoral, queremos facerlle saber que chegadas estas datas tan avanzadas do curso académico e coa organización da docencia aínda sen estabelecer, MANTEMOS A NOSA PROPOSTA DE ORGANIZACIÓN DA DOCENCIA COMO A ÚNICA ALTERNATIVA AO ACTUAL SISTEMA e que pode ser aplicada a todos os cursos, sendo a nosa unha opción que require do esforzo de todas as partes implicadas pero que supón unha mellora da situación actual, a cal non agrada a ningunha das partes.

En consideración a todo o exposto anteriormente, os estudantes DEMANDAMOS A PRONTA RESOLUCIÓN DESTA SITUACIÓN, deixando de lado a batalla política e as presións localistas dos últimos anos que tanto están a prexudicar o estudantado, e NON ACEPTAREMOS NINGÚN PLANO QUE SUPOÑA UN EMPEORAMENTO DAS CONDICIÓNS DE FORMACIÓN DOS FUTUROS MÉDICOS DE GALICIA.

Ademais, queremos facer consciente da gravidade do asunto a toda a sociedade galega e para tal informamos aos medios de comunicación e iniciaremos as mobilizacións que consideremos axeitadas.

En Santiago de Compostela, a 10 de maio de 2011.

A Xunta “de Galicia” afóganos!

2011-05-10T18:08:00.002+02:00

A ALEM non concorda necesariamente coas opinións aquí publicadas. Se queres expresar a túa opinión neste blogue, envíanos o teu escrito co teu nome a asemblealibre@gmail.com e publicarémolo aquí. Non importa o que queiras dicir, non importa o idioma (galego, portugués, castelán ou mesmo inglés), aquí non terás ningún tipo de censura.

A XUNTA “DE GALICIA” AFÓGANOS!

Por momentos no Parlamento de Galicia deixa de escoitarse a voz dos galegos para resoar só a duns poucos que esgrimen os seus intereses e fan caso omiso da opinión dos implicados nos importantes asuntos que alí se tratan.

Iso é o que está a pasar nos últimos anos, nos que de costas á Facultade de Medicina e ás organizacións médicas se aumentou desmesuradamente e a custo cero o número de estudantes de Medicina de Galicia escudándose nunha suposta falta de médicos, algo completamente falso: hai falta de determinados especialistas e en determinados lugares, pero xa nos gustaría ós futuros médicos que houbese máis prazas de formación MIR e máis prazas nas oposicións ó SERGAS que médicos que se presentan a elas…

O que ocorre é que os políticos están tan só a responder ós intereses e presións localistas de certas cidades e universidades interesadas en teren a súa propia facultade de Medicina. Durante anos as súas reivindicacións egoístas caeron en saco roto, pero agora atoparon a estratexia perfecta: afogar os estudantes de Medicina. E como afogalos? Metendo estudantes sen parar, coma se de gando se tratase, nun edificio obsoleto ata que rebenten os seus muros e a USC non teña mais remedio que soltar estudantes.

Ademais, na súa estratexia de acoso e derribo esas mentes perversas atoparon un grande aliado: a Consellaría de Sanidade que, en lugar de defender os intereses de todos os galegos, brinda en bandexa de prata o uso e desfrute dos hospitais de Galicia ás Universidades de Vigo e A Coruña para que dispoñan deles ó seu antollo e con esa escusa se poidan entremeter na organización da docencia dunha titulación que non posúen. De momento...

Así estamos, os estudantes sempre somos o último elo da cadea alimentaria... Pero poden apertarnos que non afogaremos! Ánimo compañeiros! Non vos rendades!

Escrito por Alberto Fernández, estudante de Medicina

A verdade sobre o número de prazas

2011-05-10T17:53:00.001+02:00

Lembrándomos a protesta convocada para mañá ás 13h diante da facultade de Medicina, é preciso facer un repaso aos últimos feitos que teñen acontecido acerca da posíbel diminución do número de prazas.

O estudantado levamos anos pedindo que cese o aumento indiscriminado de prazas. No ano 2005-2006 había 260 prazas para novos estudantes que entrasen en primeiro. No actual ano 2010-2011, este número é de 400. A nivel global do Estado o número total de estudantes novos aumentou en 55%, até os 6.733, mentres que o número de prazas do MIR diminuíu en 4%, até os 6.255. Contando que ao exame do MIR tamén se presentan estudantes provenientes do estranxeiro e xente que quere repetir o exame, temos que hai máis candidatos a médicos que prazas do MIR. Se a isto sumamos as validacións de títulos médicos do estranxeiro, uns 45.000 na última década, temos un número total me médicos máis elevado do que o sistema sanitario pode absorber. E, como se ve cada convocatoria, o número de persoas que opositan a postos no Servizo Galego de Saúde é moito maior que as prazas ás que optan.

Por que din que hai carencia de médicos? Pois porque é o xeito máis fácil de xustificar o mal funcionamento da sanidade. Así, os gobernantes poden alegar que a culpa non é deles e diciren que con aumentar as prazas de estudantes de Medicina arránxase. E se os estudantes de Medicina se queixan, eles alegan que é por non quereren competencia, por pretenderen ser uns privilexiados. Así, sen gastaren un peso, dan aparencia de estaren a solucionar o problema. O que non ven é que se pode repetir unha situación insustentábel como a da década de 80, onde un elevadísimo número de médicos estaban desempregados ou subsistían con contratos-lixo por horas. Unha situación que levou máis de quince anos arranxar.

No caso concreto de Santiago, o aumento de 260 a 400 prazas fíxose sen aumentar o orzamento que a USC dedica a Medicina. É máis, mesmo chegando a diminuír por causa da crise. Entón, hai máis estudantes con menos recursos para a súa educación.

Despois de escritos, peticións, decisións unánimes entre estudantado e decanato e mesmo manifestacións, todo parecía indicar que para o ano serían reducidas as prazas a 300 ["A Universidade de Santiago reduce cen prazas de Medicina" LVG 6/5/2011]. Era unha decisión lóxica que contou finalmente co apoio do reitorado. Non obstante, a Consellaría da Educación da Xunta de Galicia, á frente da cal está o sr. Jesús Vázquez Abad, por boca do Secretario Xeral de Universidades, José Alberto Díez de Castro, anunciou que van botar abaixo a proposta e manter as 400 prazas actuais ["Educación apuesta por no variar las plazas de Medicina y mantener las 400 actuales" ECG 10/5/2011].

Escrito por Jon Amil, estudante de Medicina

A concentración-protesta será o dia 11!

2011-05-08T16:52:00.000+02:00

O secretario da facultade, o prof. Lima, e o Comisionado de Ciencias da Saúde da USC, o prof. Macía, xa coñecen con todo detalle o exposto no comunicado e as súas motivacións. Tamén nos informaron dende o reitorado de que estaban a cadrar a axenda do reitor para ter unha reunión connosco o antes posíbel.

Alén disto, comunicáronnos que segunda e terza feira (luns e martes) o Decano estará de viaxe, polo que cremos axeitado adiar a concentración até cuarta feira (mércores). Entón:

CONCENTRACIÓN DE BATAS BRANCAS

Cuarta feira (mércores) 11 DE MAIO ás 13h00

da porta da FACULTADE DE MEDICINA até a porta do REITORADO

Lembrade levar a bata posta, cartaces e instrumentos ou obxectos para facer música e barullo (gaitas, bombos, potas, panelas...). E pensade consignas para berrarmos.

Sentimos o baile de datas, mais debemos xogar ben as nosas bazas para que teñan o efecto desexado.

Saudiña!

Erros oportunos nos xornais

2011-05-06T17:33:00.000+02:00

O portal de novas NoticiasGalicia.com mostraba hoxe esta capa. Esta captura de pantalla é totalmente real, ollo á foto que usaron para ilustrar as declaracións do decano en apoio á redución das prazas en Medicina.

Clica na foto para vela máis grande

Fonte: http://latri.ca/view/post:514719

Grazas, Anxo_Gz!

Concentración-protesta

2011-05-06T17:18:00.001+02:00

En base ao decidido onte na asemblea, en primeiro lugar enviarase un comunicado ás autoridades académicas que podedes ler na seguinte ligazón: http://ir.gl/238fd7

E, como foi tamén decidido, terá lugar unha concentración de protesta coas nosas reivindicacións. Con motivo de dar tempo de resposta ás equipas decanal e reitoral, conveuse adiar un día a data da mesma sobre o acordado na asemblea. Por tanto:

É convocada

CONCENTRACIÓN DE BATAS BRANCAS

Terza feira (martes) 10 DE MAIO ás 13h00

da porta da FACULTADE DE MEDICINA até a porta do REITORADO

Para facer máis visíbel a protesta, prégase o seguinte:

- Levar posta a bata branca.

- Levar instrumentos musicais (especialmente gaitas) ou utensilios cos que facer barullo (potas, panelas...).

- Facer e portar cartaces con lemas feitos por vós propios (tamaño folio ou A3).

- Levar pensados lemas e consignas para berrar na concentración.

- Gravar vídeos e tirar fotos da concentración (co mesmo móbil chega) para mandárnolas e facer unha reportaxe aquí nesta web.

Se alguén ten máis ideas son enormemente ben recibidas.

Saudiña!

Conclusións da asemblea

2011-05-05T22:21:00.000+02:00

Na asemblea de hoxe presentouse a proposta da equipa decanal con todas as variacións posíbeis. Despois de estudalo detidamente, o estudantado chegou á conclusión de que é inasumíbel.

A proposta de pasar toda a docencia teórica para 4º e 5º, ficando as clínicas para 6º, fan que non se poida chegar ao número mínimo de créditos precisos para pedir a beca do Ministerio (79,5 créditos da licenciatura ou 60 créditos ECTS do grao). Por tanto, esa opción deixaríanos sen beca, cousa inadmisíbel. Por outro lado calquera opción nesta dirección implicaría pasar a grao (cousa rexeitada reiteradamente) ou ter unha carga docente demasiado grande.

Entón, o estudantado de Medicina, organizado como ALEM, decidiu defender o modelo C (teoría en Santiago, prácticas descentralizadas onde todo o estudantado vai fóra mes e medio e o resto fica en Santiago) como a mellor opción entre as posíbeis. E para defender isto resolveu tomar medidas.

Continuaremos a informar e especificaremos máis en breve. Lembramos que para calquera tipo de consulta está o correo asemblealibre@gmail.com, onde vos podedes unir á lista de correo para estardes informados ao momento.

Asemblea hoxe para todo o estudantado

2011-05-05T15:11:00.001+02:00

O prof. Gestal, decano da Facultade de Medicina e Odontoloxía, anulou de xeito unilateral todos os encontros de hoxe co estudantado. Por tanto, nin se reunirá cos representantes de estudantes nin informará da súa proposta nunha asemblea para 2º e 3º.

Aínda así, a asemblea mantense na mesma, mais agora destinada á totalidade do estudantado. Nela ha de se explicar todo o acontecido ao longo da semana, incluída a reunión co reitor. Entón,

ASEMBLEA SOBRE A DESCENTRALIZACIÓN

(para todo o estudantado)

HOXE (5 de maio) ás 19h30
no Salón de actos da facultade de Medicina

Será unha asemblea eminentemente informativa, e é importante virdes para saberdes ben como vai o proceso.

Saudiña!

Novidades acerca da descentralización e outros

2011-05-03T15:30:00.000+02:00

DESCENTRALIZACIÓN 4º

Hoxe (3 de maio) de mañá algúns representantes de estudantes reuníronse co decano para aclarar o asunto da descentralización para o ano que ven. Mañá (4 de maio) farán o propio co reitor. E pasadomañá (5 de maio) voltarán a se reunir co decano.

Como consecuencia destas reunións, o decano accedeu a explicar a súa "nova" proposta nunha asemblea aberta para o estudantado de 2º e 3º. Logo:

ASEMBLEA ABERTA co DECANO

Quinta feira (xoves), 5 de maio

ás 19h30 na facultade de Medicina

A proposta que vai presentar é relativamente nova. Trátase dunha asequilibización da proposta que falamos na asemblea pasada. Así, agora propoñen que os estudantes dos actuais 2º e 3º non teñan prácticas até chegaren a 6º, mais ficando na licenciatura. Isto é, concentrarían as materias teóricas entre 4º e 5º, e deixarían as clínicas para 6º. Á parte, estes estudantes, ao acabaren 5º terían a opción de rematar como licenciados ou como grao+máster sen perder nin ter que repetir nada (a diferenza sería o traballo de fin de grao, que uns terían que facer e outros non).

Tamén estudan unha variación disto, que deixaría algunha materia teórica para 6º de modo que non se saturase tanto a teoría de 4º e 5º. En troca, con isto os estudantes perderían a opción de acabaren como grao+máster. Ollo, esta é só unha opción que han de estudar, non a proposta principal.

E este sistema non contraria o plano de estudos e é perfectamente factíbel, xa que só variaría a orde en que se matricular das materias e os horarios de impartir as materias.

DESCENTRALIZACIÓN 5º E 6º

Para 5º e 6º do próximo ano agárdase á resolución do tema para 4º. No caso de se aprobar a proposta decanal, formularíamos a opción de que só se descentralizasen os voluntarios.

OUTROS TEMAS

- A proposta da Facultade e da Universidade para o próximo ano é que as prazas de novo ingreso se reduzan a 300. Falta o visto e prace da Xunta de Galiza.

- Xa foi aprobada a concesión de 7,5 créditos de libre por cada período de prácticas de verán. Non obstante, non se puido modificar o tope de 15 créditos por prácticas no total da carreira, pois isto está blindado polo noso actual plano de estudos. Alén disto, espérase que o Servizo Galego de Saúde envíe a proposta de prazas a escoller para este verán.

- Na Xunta de Facultade pediuse a instalación de máis enchufes nas salas de aulas. Grazas á disposición e ofrecemento dos bedeis, farase o antes posíbel.

- Nesta Xunta de Facultade tamén se fixo unha queixa pola falta de prácticas de Farmacoloxía debida ao atraso no acondicionamento dos laboratorios.

E isto é todo por hoxe, saudiña!

A verdade sobre a descentralización

2011-04-28T01:02:00.001+02:00

O VERDADEIRO MOTIVO DA DESCENTRALIZACIÓN

A clase política da Coruña e Vigo decidiu que, xa que tiñan cada un súa Universidade, querían tamén cada un súa Facultade de Medicina. Os partidos políticos a nivel galego viron a oportunidade de gañar votos nas dúas maiores cidades galegas e apoiaron a idea. Mais faltáballes unha escusa para facelo, xa que a Facultade de Medicina da USC era suficiente e competente naquela altura. Resolveron alegar unha falta de médicos, e propor como solución definitiva aumentar o número de prazas de estudante de Medicina. Non quixeron ver que hai moitos médicos no paro por falta de traballo na sanidade pública, nin que cada vez haxa menos prazas de residente para especializarse, nin que moitos médicos decidían ir a outros países por teren mellores condicións de traballo fóra. Non, decidiron aumentar as prazas e facer campaña para que quen nos opúñamos a tal aumento parecésemos elitistas que non queren competencia.

Deste modo saturaron Santiago até que non collesen os estudantes e así obrigar a descentralizar, enviándoos fóra. E, ao mesmo tempo, blindaron Vigo e A Coruña para que fosen os únicos destinos onde puidesen ir. De momento a Facultade de Medicina resistiuse, descentralizando apenas as prácticas, mais este ano A Coruña manifestou querer dar tamén a docencia do 4º curso e ir aumentando até dar todo o segundo ciclo. Para que? Para que sexa necesario contratar profesores e crear infraestruturas. Así, nuns anos, con estudantes, docentes e infraestruturas propias, dicir que non ten sentido continuar baixo a tutela da USC. Así, finalmente, teren a súa facultade. E resta dicir que atrás da Coruña irá Vigo, xa que para a clase política non ía permitir que Vigo fose menos que A Coruña.

E nós, no medio de todo isto. Somos os danos colaterais dunha guerra localista.

COMO FOI O PROCESO DA DESCENTRALIZACIÓN

Ao final do curso 2007-2008 o decanato decidiu facer un modelo cuadrimestral para aplicar o ano seguinte, onde os estudantes estivesen un cuadrimestre en Santiago coa teoría e outro na Coruña, Vigo ou Santiago coas prácticas. Nunha Xunta de Facultade que tivo lugar no mes de xullo, despois dos exames, os representantes de estudantes, que xa estaban de vacacións, acudiron á Xunta de Facultade e botaron abaixo a proposta. Así, grazas e eles, no curso 2008-2009 non houbo descentralización.

No curso 2008-2009 houbo unha serie de asembleas e xuntanzas coa equipa decanal para ver cal sería o mellor método para descentralizar as prácticas. Acordos entre o reitorado, consellaría e diversas institucións resolveu que 50 estudantes de cada curso irían para Vigo e outros tantos para A Coruña. O estudantado era unánime na súa reivindicación: Que só fosen fóra os voluntarios, sen obrigar ninguén mesmo que non se enchese o número pactado de 50. Mesmo houbo unha manifestación para reivindicar isto e outra para deter o aumento do número de prazas de estudante de Medicina. Lamentabelmente, fracasouse. As institucións cederon pouco e, ao final, saíu un modelo que non agradou a ninguén: Os naturais de Vigo e da Coruña irían facer as prácticas ás súas cidades natais, ao igual que unha porcentaxe de estudantes de fóra do Estado (eufemismo que oculta unha clara discriminación ás persoas de nacionalidade portuguesa). As listaxes foron feitas polo Vicedecano de Práctica Clínica e era el quen, en base ás alegacións persoais, decidía quen podía ficar en Santiago e quen ía descentralizado. O único que nos deron foi que puxeron buses, cuns horarios infernais, para aquela xente que tivese que ir e vir a diario. E que aquela xente que fose descentralizada un ano non tería que repetir para o seguinte.

Durante este ano tamén se realizou o novo plano de estudos, o arquicoñecido Plano de Boloña, que entraría en vigor para os de primeiro curso no ano 2010-2011. Nese novo plano resolveuse que non habería prácticas até sexto, que sería un curso denominado rotatorio, só con prácticas. Ao facer isto, vóltase ao modelo que existía hai anos, onde ao chegar a sexto a xente escollía o hospital galego que preferise para facer as prácticas todo o ano. Unha vez que se decide isto, a descentralización pasa a ser apenas un parche para os estudantes que aínda fiquen no plano antigo, que expiraría en 6 anos a partir de que entrase en vigor o novo.

No curso 2009-2010 os descentralizados sufriron as consecuencias, mais coa idea de non seren ao ano seguinte. Mais claro, ao non repetiren os mesmos, non había o número suficiente de estudantes de Vigo e da Coruña para encher ese cupo de 50 estudantes por curso para cada cidade. Entón o Vicedecano mudou as condicións de xeito unilateral e fixo un sorteo. Meteu os nomes de todos os estudantes nunha bolsa e foi sacando nomes até encher o número prefixado deles. Alegou que, habendo buses, a xente podía ir e vir a diario sen problema.

E chegamos ao curso actual, 2010-2011, onde recibimos unha nova que xa se vía vir: A Coruña pediu a docencia teórica do 4º curso, para evitar ao estudantado ter que ir e vir no bus. Mais neste curso tamén mudaron os interlocutores, xa que as eleccións deron como resultado unha equipa decanal e unha equipa reitoral novas, sen moito coñecemento previo sobre a descentralización. E os estudantes que entraron en primeiro comezaron xa co plano de Boloña. No medio deste caos, o estudantado en asemblea decidiu un modelo onde todo o mundo fixese prácticas mes e medio na Coruña ou Vigo e o resto, xunto coa teoría, en Santiago. Así habería igualdade para todos e non habería necesidade de dar teoría na Coruña. Isto foi denominado modelo C, e é o defendido actualmente. A equipa decanal xunto co reitorado, por súa parte, tiveron unha idea: Se para o ano os de 4º pasan a Boloña, non teñen que ir descentralizados e, ao mesmo tempo, habería máis espazo no hospital e os de 5º e 6º tampouco terían que se ir (cousa errada, pois as prácticas de cada curso son en servizos diferentes). Iso si, dixeron que só farían pública esta proposta despois das eleccións municipais do 22 de maio. Alegaron non querer influír nelas, demostrando unha vez máis como os intereses políticos priman fronte a calidade no ensino que demanda o estudantado.

Escrito por Jon Amil, estudante de Medicina

Asemblea urxente

2011-04-26T23:23:00.000+02:00

Até este momento non conseguimos unha reunión co reitor, mais desde o decanato avanzáronnos que teñen unha proposta que conta co apoio da equipa reitoral.

Para expor e debater a dita proposta convócase:

ASEMBLEA URXENTE

Mañá (cuarta feira 27 de abril)

ás 19:45 na Facultade

O principal punto na orde do día será a descentralización para todos os cursos, polo que non se realizará unha segunda asemblea en días posteriores. Prégase a máxima difusión e asistencia, pois é un momento chave en que debemos tomar decisión.

Sentimos inmenso convocar con tan pouca antecipación, mais é unha cousa moi urxente e ninguén pode falar no nome do estudantado sen antes saber a súa opinión.

Vémonos alí!

O prof. Carracedo e o Instituto Galego de Estudos Célticos

2011-04-16T13:23:00.001+02:00

Todo comezou hai dous días, cando o Instituto Galego de Estudos Célticos anunciou que o catedrático de Medicina Legal da USC Ángel Carracedo (ver foto) daría unha conferencia no seu III Congreso Internacional sobre a Cultura Celta. E aínda que o a conferencia ía versar sobre as semellanzas xenéticas entre individuos galegos e habitantes das illas británicas, desde a organización tiraron as propias conclusións e informaron aos medios de que o prof. Carracedo asegurara que "á luz das evidencias xenéticas, a lenda de Breogán era certa".

Desta información foi publicado un artigo no xornal galego Galicia Hoxe (do grupo compostelán El Correo Gallego), que reproduzo a seguir:

Galicia, o berce da estirpe [Galicia Hoxe, 14/04/2011]
Os celtas galegos son os máis antigos do Atlántico

Todo empezou en Galicia: o berce da humanidade no Atlántico. Fai máis de 20.000 anos, os primeiros poboadores do continente europeo fuxiron das glaciacións e acantoáronse no noroeste peninsular. En Galicia, os celtas fundaron a súa cultura, a súa relixión, a súa patria. E tras o desxeo, volveron emigrar: primero asentáronse en Irlanda, despois en Gran Bretaña e para rematar regresaron ó Vello Continente. A marabillosa investigación xenética do profesor Anxo Carracedo, catedrático de Medicina Forense da Universidade de Santiago de Compostela, confirma que "a lenda de Breogán era certa". E ao final, os ingleses e os irlandeses descenden do noso sangue: teñen ADN galego.

A teoría de Carracedo poderá coñecerse en directo mañá ás 10.15 horas no III Congreso Internacional sobre a Cultura Celta, no Pazo da Cultura de Narón. Carracedo, director do Instituto de Medicina Legal da USC, demostrará "os movementos de poboación do Noroeste galego á luz da xenética". Os seus estudos evidencian que os celtas galegos son os máis antigos do mundo. Branca García Fernández-Albalat, historiadora e organizadora do congreso a través do Instituto Galego de Estudos Célticos, celebra estas conclusións: "Galicia repoboou tras o desxeo a Europa Atlántica, desde a Bretaña francesa ata Inglaterra e Irlanda". Cada pobo desenvolveu a súa propia historia, pero todos se asentaron nun mesmo patrón de "cultura, relixión e institucións".

Ata as tradicións dos celtas galegos cruzaron o Atlántico e multiplicáronse no Novo Continente. O Halloween norteamericano procede do noso outonal Samaín, "co mesmo respecto reverencial polos mortos, na Noite de Todos os Santos". Nin sequera o Imperio Romano e o cristianismo puideron coas nosas raíces gaélicas.

A Igrexa católica decidiu asentar as súas igrexas sobre os antigos lugares sacros celtas, porque os galegos seguían reuníndose alí para honraren os seus deuses.

O historiador e arqueólogo do Concello de Narón, André Pena Graña, indica que o congreso "porá sobre a mesa as tres liñas de estudo principais que evidencian a nonsa orixe celta: a xenética, a lingüística e a arqueoloxía institucional".

Se Carracedo mostrará sobre o mapa o movemento dos pobos, os profesores Juan José Moralejo e Caros Búa Carballo relatarán o transvasamento lingüístico e de toponimia.

O pobre prof. Carracedo, ao ler este artigo, non tardou en enviar un comunicado desmentindo que esas declaracións saísen sa súa boca:

Comunicado enviado polo profesor Ángel carracedo [El Correo Gallego, 15/04/2011]

Hoxe ao ler O Correo ao almorzo case me da o infarto ao verme en portada cun titular dicindo que os galegos somos os celtas mais antigos de Europa. Eu que nin tan sequera teño ben claro quen eran os celtas.

O mais abraiante foi que eu non falei con ninguén, nin ninguén me entrevistou e aparecen declaracións miñas que ademais de disparatadas, algunhas delas, eu nunca dixen.

A razón de todo isto é que mañá teño que inaugurar un congreso en Narón onde me atrevín a ir para falar dos movementos de poboación en Europa a luz da xenética, precisamente para o contrario do que se desprenda nas supostas miñas declaracións, e dicir para desmitificar o que a xenética pode aportar na controversia do celtismo en Galicia.

A xenética de poboacións fala de movementos de individuos non de culturas e pobos. Pode ser unha ferramenta auxiliar de utilidade para historia sempre que sexa ben utilizado, que xa empezo ter as miñas dúbidas de que o vaia a ser.

Pero os pobos e as culturas son outra cousa nas que na xenética non pode entrar. Eu pouco sei de xenética pero nada dos celtas e simplemente polo que leo e aprendo do que outros falan paréceme claro que si existiron unhas linguas celtas, algunhas das cales falábanse polo menos en áreas da nosa terra a chegada dos románs, pero a partir de aquí eu aínda estou no grupo dos escépticos, sempre aberto a ser convencido do contrario por suposto, pero dáme a impresión de que si do que se trata é de definir aos celtas como pobo, vai ser unha polémica inútil porque o que define a un pobo e o sentimento de pobo dos seus integrantes, e non podemos voltar ao pasado para preguntarlles si é que se sentían celtas ou non os que de aquela vivían aquí.

A xenética aínda con moitas limitacións cando as poboacións son moi próximas pode falar de migracións, particularmente mediante o uso de marcadores do cromosoma Y e do ADN mitocondrial que falan das liñas paterna e materna pero non pode dicir cal era a cultura ou a fala das persoas que levaban eses liñaxes.

Mentres preparo con poucas forzas xa a conferencia de mañá dúas reflexións, a primeira que non vale todo para promocionar un congreso, e a segunda que a información ten que ser un pouco mais serio, como mínimo contrastar as noticias e nunca poñer en boca de outros cousas que nin dixeron nin pensan.

En resumo, os galegos poderemos ser celtas ou non. A lenda de Breogán poderá ser certa ou non. Mais os estudos xenéticos non serven para demostralo xa que o o celtismo pertence ao campo do cultural e lingüístico. E, certamente, o prof. Carracedo nunca declararía cousas das que non tivese evidencia científica.

Prácticas de Verán: 7,5 créditos por mes

2011-04-11T13:19:00.000+02:00

Coa implantación dos distintos graos na USC está a diminuír drasticamente a oferta de créditos de libre configuración, xa que co novo plano desaparecen. Con todo, os licenciados en Medicina aínda temos que facer 53 créditos. Para solventalo, o decanato accedeu a unha das medidas que o estudantado leva máis tempo reivindicando: Unha maior valorización das Prácticas de Verán.

Así, segundo nos informaron na pasada sexta (venres), as novas condicións para as Prácticas de Verán serán as seguintes:

- 7,5 créditos/período de prácticas (mes)
- Máximo de créditos por verán: 15 (2 períodos/verán)
- Realización obrigatoria dunha pequena memoria

Porén non todo está conseguido. Segundo a normativa vixente o número máximo de créditos que podemos facer por Prácticas de Verán son 15. Por iso, os representantes de estudantes pedimos que aumente este tope até 30 (equivalente a 1 mes de prácticas por verán de 2º a 5º). E aínda que nun comezo é complicado, xa existen precedentes como o caso dos cursos de libre (tipo ciclos de cinema e tal), cuxo tope foi eliminado hai uns anos (agora pódense facer cantos créditos queiras dese modo).

No caso de que alguén xa teña a libre configuración completa e non precise de créditos, as prácticas poderá facelas igualmente. O único que terán prioridade os que aínda non as fixesen. Nesta ámbito tamén estamos a pedir un sistema de asignación regrado e transparente. Tentarase considerar un baremo xusto (residencia, ano académico, expediente...) para repartir as vagas e impedir a inseguridade e desorganización dos últimos anos.

Por útimo, tamén pedimos que haxa unha lista orientativa das vagas de prácticas antes do prazo de solicitude, para así facer a inscrición con coñecemento e non ás cegas. Para isto debera colaborar o Servizo Galego de Saúde.

Os bicos e abrazos dádellos a Montse e Alberto, que son quen xestionaron todo isto.

O perfecto mundo imperfecto (Escola de Menciñeiros) - II parte

2011-04-03T23:50:00.001+02:00

Velaquí vai a segunda parte do escrito do noso marabilloso mundo [podes ler a primeira parte aquí: http://www.asemblealibre.eu/2010/11/o-perfecto-mundo-imperfecto-escola-de.html], que cada quen o tome como queira e se quere que reflexione ou non.

Neste noso mundo maravilloso, eu ouvín o seguinte comentario: "Os mellores estudantes son os que sacan moi boas notas e aproban todo á primeira; o resto, que se poderían definir como mediocres, non me interesan; os bos e importantes son os que destacan". Relacionado con este, tamén vai o seguinte: "O meu mellor estudante é unha persoa x, que me sacou a mellor nota na miña materia" (Puntualización, esta persoa non ía polas aulas).

Podería ser asequible de non ser porque me anoxan comentarios como estes. Hai persoas, que día após día, se levantan ás 7:00-7:30 da mañá para ir ás aulas e fan o esforzo de estar alí unha media dunhas 6-8 horas, porque precisamente lles interesa a materia e queren asistir á teoría. Pola contra, outras persoas non van a estas aulas, e aproveitan este tempo para estudar. Quen é o mellor estudante: O que está na aula ou o que simplemente consegue uns apuntamentos e se dedica a estudar? Difícil é opinar, cada quen que tire as súas conclusións.

Outra cuestión: Na nosa carreira, é mellor estudante aquel que leva unhas notazas, custe o que custar? Por todos é sabido que a dinámica de 80-90% dos actuais estudantes de Medicina é preparar os exames, cuspir todo o que saben o día chave, e despois esquecerse. Toman a pasaxe pola carreira como un mero trámite antes do MIR, pensando que total, como iso o van ver a posteriori, pois non pasa nada. A miña pregunta é a seguinte: Cando deberiamos formarnos, ao longo dos 6 anos da licenciatura ou ben nos 6 meses previos á realizacion do exame MIR? Que é o que resolvemos durante eses 6 meses? Nada, pouco ou bastante? Realmente, merece a pena chapar e esquecer máis que aprender a relacionar, non apenas a fisioloxía coa fisiopatoloxía, senón tamén os diversos tipos de patoloxías e as súas características clínicas, así como os posibles tratamentos? De nada serve que nesta altura sexamos seres racionais, temos que deixarnos levar polo camiño do condicionamento e ver como determinadas estratexias son chaves no noso éxito, no posible detrimento da nosa formación? A isto só teño unha cousa que dicir: Queremos ser médicos ou pola contra meros aplicadores de receitas de cociña chamadas protocolos clínicos? Os protocolos non deixan de ser necesarios, pero non esquezades que cada persoa/paciente é un mundo, así como a súa enfermidade e os posibles tratamentos que poida recibir. Cada quen é responsable dos seus actos, independentemente de que o sistema permita o éxito deste xeito.

Unha persoa relatoume o que segue hai uns días. Foi á consulta do seu médico de cabeceira debido a que levaba un tempiño mal das cervicais. A pesar de que vai a fisioterapia, nota que non mellora xa que ten melloras leves pero volve empeorar rapidamente. Podería ser debido ao seu traballo, xa que se trata dunha ocupación completamente manual na que sobreexcede a carga dos brazos, pensa ela. O seu médico limitouse ao seguinte: auscultala por riba dun xersei de la (dous puntos cardíacos e as bases pulmonares) e a toquetearlle un chisco o pescozo (cito palabras textuais). Non lle dixo a que podía ser o problema e simplemente recomendoulle que non fixese eses sobreesforzos que ela relata. Agora ben a miña pregunta: Que fai? Deixa de traballar? Pide unha segunda opinión? Credes que a actitude é a correcta?

Escrito por Montse Fernández, estudante de Medicina

Asemblea para a descentralización de 5º e 6º

2011-04-03T21:06:00.000+02:00

É convocada unha segunda asemblea, especialmente dirixida a estudantes de 4º e 5º, sobre a descentralización para o vindeiro ano. Será na:

Cuarta feira (mércores) 6 de abril,

ás 18h30 na Aula Magna do aulario

Lembramos que para estudantes que pasan a 5º e 6º a descentralización é só prática. As alternativas que manexamos actualmente son dúas. Por un lado, continuar co modelo actual de enviar xente todo o ano a Vigo e á Coruña, e polo outro un modelo novo onde todo o mundo iría un mes e medio fóra de Compostela (Vigo ou A Coruña) e o resto do tempo estaría aquí.

Estas dúas opcións serán apresentadas nesa asemblea, así como outras que sexan propostas. Alí debaterase e votarase cal é a opción preferida para o estudantado. Esa opción será a que defendamos e tentemos obter das institucións.

Por último, só lembrar que a ALEM é unha asemblea aberta e non unha organización fechada, polo cal todo o estudantado de Medicina ten voz e voto nesa asemblea.

Vémonos alí! Saudiña!

O Grao de Medicina da USC será impartido integramente en inglés

2011-04-01T18:07:00.002+02:00

«No 1 de abril van os burros onde non deben ir»

Esta nova é unha brincadeira do primeiro de abril. A tradición do primeiro de abril é unha celebración galega compartida con moitos outros países occidentais, aínda que perdeu forza nos últimos tempos.

Hai uns días saíu na prensa a nova de que, ao abrigo do Espazo Europeo de Educación Superior (máis coñecido como Boloña) habería que implementar nos Graos o idioma inglés progresivamente. A medida, feita para favorecer a mobilidade entre estudantes, foi aceptada con agrado polo profesorado, quen se mostrou disposto a colaborar.

O novo Decanato de Medicina da USC, na vangarda da política universitaria, decidiu ser pioneiro na implementación do inglés. Así, para o ano, todos os exames do Grao serán en inglés. Con todo, as aulas poderán continuar a ser impartidas en galego ou castelán até o 2015, data límite imposta polo reitorado para adaptarse totalmente.

Desde a ALEM habemos de convocar unha asemblea para informar todo o estudantado de Medicina desta nova e sondar a opinión maioritaria do estudantado. Mais é importante aclarar que é unha decisión xa tomada polo Ministerio e a Consellaría que non se pode evitar, tan só pedir facilidades para nos adaptarmos.

Saudiña!

Lega-legalización!

2011-03-17T16:41:00.000+01:00

O lonxincuo 7 de novembro de 2007 tivo lugar a asemblea fundacional da ALEM, Asemblea Libre de Estudantes de Medicina. Nela decidiuse que, para ter lexitimidade perante as institucións, sería rexistrada como asociación. Así poderíamos funcionar realmente como un instrumento do estudantado con toda a lexitimidade da lei vixente.

Non foi un, nin dous, nin tres, senón cinco veces as que tivemos que ir á Xunta de Galicia para que nos admitisen no rexistro. Cinco veces coas correspondentes taxas, obviamente. E cinco veces que houbo que adaptar os estatutos a requisitos sacados da manga dunha institución con demasiado afán recadatorio.

Non obstante, desde onte 16 de marzo de 2011, a ALEM ten personalidade xurídica!

ESTAMOS LEGALIZADOS!

Asemblea sobre como vai afectar a descentralización ás estudantes de 2º

2011-03-09T21:38:00.002+01:00

ASEMBLEA DESCENTRALIZACIÓN TEÓRICA
(Como vai afectar ás estudantes de 2º?)

Quinta feira (xoves), 10 de Marzo ás 18h45 na facultade de Medicina

Despois da asemblea da pasada semana en que finalmente só se falou do que será a descentralización de 4º do próximo curso, e a pesar de que a ela estaba convocada todo o estudantado, decidiuse facer unha outra para informar especificamente as estudantes de 2º, xa que o tema lles afecta de xeito inminente.

Deste modo, convócase unha asemblea informativa sobre a descentralización especialmente dirixida para estudantes de 2º ano (mais aberta a calquera estudante) na quinta feira (xoves) 10 de marzo ás 18:45 en que os representantes de estudantes e delegados que forman parte da Comisión de baremo da descentralización exporán todas as variantes saídas da asemblea pasada.

Para o estudantado no seu conxunto, continuaremos a tentar asegurar a máxima información posíbel, tanto por parte do decanato como do reitorado.

Alén disto, para poder ampliar a proposta de facer as prácticas a outros hospitais galegos, precisamos da vosa colaboración. Por favor, que todos os interesados en facer prácticas para o ano nos hospitais de Ferrol, Lugo, Ourense e Pontevedra envien un correo-e co asunto "outros hospitais" a descentralizacionmedicina@gmail.com indicando nome, DNI, curso e hospital. Unha vez teñamos uns datos aproximados de demanda trataremos o tema co Decanato e, o máis importante, coa Consellaría de Sanidade, o principal obstáculo para que se realice.

Saudiña!

Entroido

2011-03-04T15:27:00.000+01:00

ENTROIDO!!

Gato Fedorento - Boa educación no quirófano

2011-02-27T00:52:00.011+01:00

Podedes encontrar máis sketches dos Gato Fedorento no Youtube.

Asemblea 1 de Marzo - Descentralización teórica (Actualización)

2011-02-26T14:44:00.003+01:00

ASEMBLEA SOBRE A DESCENTRALIZACIÓN TEÓRICA

Terza feira (martes), 1 de Marzo ás 18h30
na sala de aulas 8 da facultade de Medicina

Convocada pola ALEM e secundada polos Comités, MeIGa e os delegados de 3º

Comunicado dos asistentes á reunión co decano para formar a Comisión Asesora do Baremo da Descentralización:

Santiago de Compostela, 24 de febreiro de 2011

Estimadas compañeiras,

Após a solicitude do decano para constituír a Comisión Asesora do Baremo de Descentralización, esta mañá ás 10:30 aproximadamente, reunímonos Olaya (Delegada do Grupo I de 3º), Teixo (Delegado do Grupo II de 3º), Alberto (ALEM), Montse (ALEM), Tania (Comités) e Andrés (MeIGa).

O obxectivo desta comisión é estabelecer un baremo xusto e transparente para todos os estudantes que no curso académico 2011-2012 vaian comezar o segundo ciclo universitario da licenciatura de Medicina.

Despois do acordo común, para poder presentarlles a situación como se debe, queremos convocar unha asemblea informativa o próximo:

MARTES 1 DE MARZO 2011 ÁS 18:30 NA AULA 8

Nesta asemblea queremos exporlles toda a información que recibimos e cal vai ser o noso plano de acción para esta tarefa.

De aquí a aló, o noso traballo será preparar a exposición o mellor posíbel e de solicitar tanto o salón, como a colaboración dos profesores con aulas a esas horas. A razón deste horario é poder dispor do tempo para facer as cousas ben e explicar todo o necesario.

Polo voso lado, até o momento da reunión, rogámosvos dúas cousas:

• En primeiro lugar, un máximo de tranquilidade. Estamos nunha fase de propostas, non de decisións e actualmente non hai ninguén na facultade de Medicina coa información suficiente ou coa autoridade para poder dar detalles xa que é un proxecto vivo e activo. O que podemos garantir é que, como comisión, temos previsto escoitar opinións e usar todos os medios necesarios para que esta proposta sexa o máis realista posíbel e o máis adaptada a todos os estudantes implicados.

• En segundo lugar, pedimos un máximo de presenza na dita asemblea. Que esteades dispostos a escoitar e botarnos unha man con este grande labor. É unha primeira reunión na cal o único que queremos é presentarnos, informar, explicar cómo temos previsto traballar, cales son os nosos
factores limitantes e, se for posíbel, comezar a escoita de opinións. Nada máis.

Por último, parécenos importante resaltar que é un esforzo que temos que facer en conxunto. Empregaremos todos os medios das diferentes asociacións e dos blogues de clase para comunicar información e os diferentes avances. Iso si, decidimos facer comunicacións como comisión e, para evitar problemas de comunicación, farémolo de forma conxunta. Unha vez que os seis esteamos informados e de acordo coa información a transmitir comunicarémola. A razón non é para filtrar información, todo o contrario. Podemos garantir que todo o que saibamos será de coñecemento público. Só que, visto o delicado que é este tema para todos e o fácil que é facer más interpretacións, decidimos actuar desta maneira.

Na espera de vervos na asemblea mandámosvos un saúdo.

Atentamente,

A Comisión Asesora do Baremo de Descentralización

Chistes médico-absudos

2011-02-25T23:34:00.020+01:00

Ola rapazada! Toca Super Sexta! Durante esta época de exames a moitos se nos quentan os miolos de tanto estudar. Produto desa dexeneración mental, as sinapses neuronais fan asociacións de ideas absurdas e surrealistas que parece que só nos fan graza a nós. Pois ese é o tema de hoxe, os chistes médico-absurdos.

- Se unha célula non cabe, é porque está sincitio?
- Os tres Reis Magos son: Melchor, Gaspar e Valsartán.
- Estatina? Non, non está.
- Inmunodeficiente é a persoa que suspendeu Inmunoloxía.
- A Uroloxía é fácil, son todo caralladas.
- Fotofobia: Medo ás fotos.
- O teu mozo é tocólogo? E non che sería mellor un meteorólogo?
- Sintetasa no hay paraíso.
- Un diabético non pode ser do Sevilla?
- Gonadal e feliz ano novo!

Se queredes achegar máis, póndeos nun comentario nesta entrada, vía twitter a @asemblealibre ou vía correo-e a chistes@asemblealibre.eu

Acerca de Transplantes e Rehabilitación

2011-02-23T19:14:00.000+01:00

Resúmovos o que se dixo sobre o método de avaliación nas presentacións de ambas as optativas:

- Transplantes: Segundo o profesor foi pouca xente á aula tendo en conta o total de matriculados. Se non vai un volume de xente maior o método de avaliación será un exame en xuño (cousa que non se fai desde hai 6 anos). Caso contrario, a avaliación será un traballo en grupos de 2-3 persoas.

Entón, por favor, se estades matriculados en Transplantes ide ás aulas polo ben de toda a xente!

- Rehabilitación: O prof. Barreiro mostrouse desconforme co grande número de matriculados (cerca de 140, cando o ideal parecen ser 70). Debido a isto, dixo que con tanta xente matriculada é posíbel que faga exame en xuño en lugar do control de asistencia habitual que abondaba para aprobar. Caso de facer a avaliación por asistencia, só se poderá faltar ao 10% das aulas, o que vén sendo que só se pode faltar 1 día. Nin sequera exames como o de Bioquímica serven de escusa para a non asistencia. E ollo, que tamén ten dous días (dúas mañás) de práticas obrigatorias.

De modo que, por favor, se non estades xa matriculados en Rehabilitación mellor non o fagades e, se o facedes, tende en conta que hai que ir todos os días para aprobar.

Saudiña!

Asemblea 1 de Marzo - Descentralización teórica

2011-02-22T22:39:00.002+01:00

ASEMBLEA SOBRE A DESCENTRALIZACIÓN TEÓRICA

Terza feira (martes), 1 de Marzo ás 18h30 na sala de aulas 8 da facultade de Medicina

Desde o decanato comunicáronnos que para o ano académico 2011-2012 haberá descentralización da docencia teórica para o 4º curso de licenciatura, pero non temos mais detalles, nin en que centros (só Vigo, só A Coruña, só os dous, algún máis...) nin en que condicións (obrigados ou non e baixo cales criterios).

Foi convocada unha reunión na próxima quinta (xoves) para constituír unha comisión asesora de baremación da descentralización (isto é, facer unha comisión que escolla os criterios con siso e dun xeito razoábel para, no caso de obrigaren a descentralizarnos, que vaian só aqueles que teñan máis facilidade). Esta comisión foi unha petición insistente da ALEM desde o comezo do "problema" da descentralización, mais até agora nunca accederan a ela. Á dita reunión asistirán Alberto e Montse (ALEM) e un representante de MeIGa, unha representante de Comités e os dous delegados de terceiro. Descoñecemos que se vai tratar na reunión para alén da creación da comisión que se encargará de establecer o baremo para a elección dos estudantes descentralizados.

Entón, para dar toda a información que sobre o exposto na reunión e tomar as decisións pertinentes, convócase unha Asemblea da ALEM para a terza (martes) 1 de marzo ás 18h30 na facultade de Medicina (sala de aulas 8). Como sempre, está chamado a vir á asemblea todo o estudantado de Medicina, polo que pregamos máxima difusión e asistencia. Lembrade que na Asemblea todo o mundo ten voz e voto e o que alí se decida será o que defendamos perante o decanato.

Ode ao anestesista

2011-02-11T23:56:00.003+01:00

Se hai un par de semanas na Super Sexta un anestesista deixaba en ridículo un ortopedista, esta semana toca ridiculizar o anestesista. Apresentamos a canción Anaesthetists Hymn (Ode ao anestesista) do grupo británico Amateur Transplant.

Lembra que para ver a tradución ao galego, o botón CC que aparece ao reproducir o vídeo ten que estar en vermello. Se non o está, é só clicares nel e xa aparecen as lexendas.

Se non van as lexendas automaticamente, clica no botón do vídeo onde pon CC.

Ornitorrincolaringoloxía

2011-02-09T17:10:00.000+01:00

Visto en Humor tonto para gente inteligente

Sorte a toda a xente no exame de mañá!

Plantillas Psiquiatría (Feb 2011)

2011-02-04T17:17:00.003+01:00

Aquí están as plantillas do exame de Psiquiatría de hoxe. Nas plantillas dos modelos A e B saíu a foto cortada e non se ven algunhas respostas, desculpai. As fotos foron cedidas polo estudante Luís Devesa. Moitas grazas, Luís!

Clica na imaxe para vela en grande

Sorte a todo o mundo!

Actualización: Podedes ver as plantillas con máis calidade e comentar sobre a revisión do exame no blogue de 4º: http://enteratemed.wordpress.com/2011/02/04/plantillas-psiquiatria/

E ollo, que dixo Madó na aula que este ano non vai haber exame en abril!

Canción da depresión

2011-02-04T16:23:00.002+01:00

Hoxe é Super Sexta! Moita xente (entre eles eu mesmo) tivo hoxe exame de Psiquiatría. Como é probábel que moitos caian nunha depresión ao recibir as notas, hoxe preséntovos a Canção da depressão, do grupo brasileiro Os Seminovos.

Descargar .mp3 (Ligazón legal da páxina oficial)

Letra:
Você anda deprimido?
Mas que coisa démodé!
Tem um mundo colorido
na farmácia, para você!

A dor forte de perder uma paixão
não vai mais te incomodar.
O emprego que só causa frustração
você vai passar a amar!

Fluoxetina, Sertralina, Citalopran,
Paroxetina, Nefazodona, Clonazepan.
Para dormir bem à noite e acordar de manhã... bem melhor!

Você vai curtir novela,
vai gostar de ficar só,
vai achar que a vida é bela
você vai dançar forró.

Vai cantar os refrães bestas das canções
que só tocam por jabá.
Decorar todos os hits dos verãos,
lá, lá, lá, lá, lá, lá, lá!

Fluoxetina, Sertralina, Citalopran,
Paroxetina, Nefazodona, Clonazepan.
Para dormir bem à noite e acordar de manhã... bem melhor!

Acredite no que a bula diz:
A felicidade é química! Ninguém é infeliz!
Você será para sempre cool...
por isso a receita é azul!

Fluoxetina, Sertralina, Citalopran,
Paroxetina, Nefazodona, Clonazepan.
Para dormir bem à noite e acordar de manhã... bem melhor!

Temos novo dominio!

2011-02-02T22:39:00.005+01:00

A empresa galega de Internet Dinahosting tivo unha promoción pola cal regalaban 650 dominios .eu ás 650 primeiras persoas que os collesen. Pois ben, grazas a esa promoción conseguimos totalmente gratis e polo período dun ano o dominio www.asemblealibre.eu.

Se queres o teu dominio .eu gratis aínda estás a tempo, vai a esta páxina e rexistra o teu: https://dinahosting.gl/gz/promos/regalo-dominios-eu

Que significa isto? Pois que a partir de agora para virdes a este blogue deberedes pór no navegador o enderezo www.asemblealibre.eu, así de sinxelo. Non obstante, o vello enderezo www.asemblealibre.blogspot.com aínda redirixirá á web a aquelas almas que non reparasen na mudanza do dominio.

Á parte disto, e aproveitando as opcións que nos dá o ter un dominio de noso, temos funcionando os subdominios facebook.asemblealibre.eu, twitter.asemblealibre.eu, tuenti.asemblealibre.eu, latrica.asembealibre.eu, youtube.asemblealibre.eu e cabozo.asemblealibre.eu, que redirixen aos perfís da ALEM en cada unha desas redes sociais.

Saudiña a todos!

Plantilla de Médica I (Feb 2011)

2011-01-31T21:23:00.001+01:00

Estas son as respostas correctas do exame parcial de Médica I que tivo lugar esta mañá. O "x" é unha resposta que estaba en branco na plantilla. Tende en conta que esta plantilla foi copiada por un estudante manualmente e pode ter erros, polo que é apenas orientativa (no caso de estares no limbo do aprobado, mellor vai comprobalo ao aulario).

O aprobado está no 70% das preguntas, restando cada unha mal 0,33. Iso fai que o aprobado estea en 44,1 preguntas ben. Non obstante, tenden a baixar o nivel de aprobado, tendo chegado a 35 ou 36 nalgún ano anterior. Se estades no limbo tranquilizaivos e esperai a que saian as notas definitivas.

As respostas están en blocos de 5, como na plantilla. Están por orde, espero que se entenda ben e non haxa confusións!

1CDCDD - 6DEDEC - 11DDDDD - 16BEEBE - 21ECBCA - 26BAAEB - 31ACBAD - 36ECBCB - 41CECEE - 46DDCEE - 51XBCCD - 56ACDCB - 61ECA

Moita sorte a todos!

Actualización: No blogue de 4º están a organizar as reclamacións ao exame, para tomar parte delas visita esta ligazón: http://enteratemed.wordpress.com/2011/02/01/reclamaciones-medica-i-poniendo-un-poco-de-orden/

Hai unha fractura. Teño que fixala.

2011-01-28T23:45:00.003+01:00

Desde VósMolades damos comezo hoxe á minisección Super Sexta. A partir de agora, cada sexta feira virá acompañada por unha entrada do blogue co humor máis absurdo que poida encontrar. Hoxe inauguramos co vídeo dunha conversa entre unha anestesista e un ortopedista.

Se non van as lexendas automaticamente, clica no botón do vídeo onde pon CC.

There is a fracture. I need to fix it.

Datas dos exames de febreiro (licenciatura)

2011-01-26T20:58:00.002+01:00

Estas son as datas dos exames, tanto parciais como finais, da convocatoria de febreiro para estudantes da licenciatura. Está indicado á esquerda os exames que son parciais e os que son de optativas, caso non poña nada son os exames de materias troncais do primeiro cuadrimestre. Aquí indicamos soamente a data, para confirmar a hora e salas de aulas ide á web da USC no caso de ser convocatoria oficial ou contactai co voso delegado no caso de ser un parcial.

As datas dos parciais son os datos de que dispomos, mais como se trata dun acordo entre profesores e estudantes son un tanto alegais e non están publicados oficialmente ningures. Nos exames de optativas e troncais os datos son os oficiais que figuran nos horarios e na web da USC.

Moito ánimo!

1º de Medicina:
Bioestatística: 2 de febreiro
Biofísica: 22 de febreiro

2º de Medicina:
Bases Psicolóxicas: 31 de xaneiro
Bioquímica II: 10 de febreiro
Histoloxía II: 21 de febreiro
Parcial Fisioloxía II: 28 de febreiro
Parcial Anatomía II: Grupo 3 (Lavandeira): 23 de marzo (Comproba a data do exame prático)
Parcial Anatomía II: Grupo 1 (Elena López): 24 de marzo (Comproba a data do exame prático)
Parcial Anatomía II: Grupo 2 (Barreiro): 25 de marzo (Comproba a data do exame prático)

3º de Medicina:
Optativa Anatomía Clínica: 31 de xaneiro
Parcial Patoloxía Xeral: 4 de febreiro
Optativa Psicopatoloxía: 7 de febreiro
Microbioloxía: 14 de febreiro
Radioloxía: 21 de febreiro
Parcial Farmacoloxía: 17 de marzo

4º de Medicina:
Parcial Médica I: 31 de xaneiro
Psiquiatría: 4 de febreiro
Otorrinolaringoloxía: 10 de febreiro
Parcial Obstetricia: 22 de febreiro

5º de Medicina:
Optativa Medicina Molecular: 1 de febreiro
Optativa Bioquímica Clínica: 4 de febreiro/28 de febreiro (Anótate nunha das datas aquí)
Optativa Enf. Tropicais: 7 de febreiro
Parcial Médica II: 8 de febreiro
Optativa Saúde Laboral: 11 de febreiro
Oftalmoloxía: 16 de febreiro
Anatomía Patolóxica II: 21 de febreiro

6º de Medicina:
Parcial Médica III: 31 de xaneiro
Medicina Preventiva: 11 de febreiro
Medicina Legal: 18 de febreiro
Farmacoterapia: 22 de febreiro

Debate das eleccións a decano

2011-01-26T16:45:00.005+01:00

Como xa saberedes, o día 16 de decembro houbo eleccións a decano da Facultade de Medicina e Odontoloxía. O Dr. Fraga deixou atrás 8 anos á frente da facultade para deixar paso ao Dr. Gestal. Actualmente, e durante os próximos 4 anos, será el quen represente e coordene o ensino da Medicina en Galiza.

Mais como o Dr. Gestal non era o único candidato, senón que tamén optaba ao posto o Dr. Crespo, desde a ALEM decidimos organizar un debate aberto a toda a xente no día 13 de decembro. Nel os candidatos explicaron os seus proxectos e obxectivos e responderon ás preguntas que se lles formularon. Así, todo o mundo puido ter unha opinión ben formada sobre cal era o candidato que lle parecía mellor.

Desgrazadamente nas eleccións a decano só teñen voto os membros da Xunta de Facultade, e non todos os estudantes como sería desexábel. Por iso a ALEM, dado o seu carácter asembleario, fixo unha sondaxe onde se lle preguntou a todo o estudantado cal dos candidatos achaba o mellor. Unha vez tidos os datos, todos e cada un dos representantes votou pola opción do estudantado. Este é o sistema que se usa na ALEM, xa que antes de cada grande decisión sempre hai unha asemblea para que todos os estudantes poidan falar e votar, sendo a ALEM apenas unha correa de transmisión da opinión do estudantado ás institucións.

Pois ben, hoxe ofrecémosvos aquí dous vídeos coas intervencións do que foi vencedor nas eleccións, o actual decano Dr. Gestal. Os vídeos fican como testemuñas de todo o que ese día foi dito, coa esperanza de que todas esas boas palabras e proxectos non acaben no esquecemento.

[Todos os vídeos están dispoñíbeis no canal de Youtube da ALEM: http://www.youtube.com/asemblealibre]

O día en que naceu a ALEM

2011-01-24T02:38:00.003+01:00

Foi un 7 de novembro de 2007. Ás 18h00 a sala de aulas número 4 da Facultade de Medicina foise enchendo, aos poucos, de xente. Uns estatutos provisionais feitos sen moito coñecemento, unhas cantas persoas sen costume de falar en público e unha boa idea. Así foi como naceu a ALEM.

Hoxe, despois de máis de 3 anos, xa pouca xente lembra aquel momento. Para moitos é difícil imaxinar unha ALEM sen Alberto e sen Montse, mais o primeiro valedor foi Jon Amil e a vice-valedora Maria Eugénia Álvares "Ástur". Os primeiros estatutos eran un caos de ideas inconexas, mais unha cousa estaba clara: Todas as persoas que estudan Medicina son iguais, e todas teñen dereito a decidir. Ese principio asembleario foi o que marcou a diferenza. Non eramos unha asociación, eramos a unión do estudantado.

Porén eran outros tempos, tempos de grandes ideas e ilusións, de proxectos nunca realizados e de disputas nunca resoltas. O que nos sobraba de esperanza faltounos de experiencia. E pouco a pouco o proxecto fóisenos das mans. Moita xente non entendeu ben o concepto de asemblea e pensaron en nós como unha asociación calquera. Outros confundíronnos, querendo ou sen querer, coa Assembleia Geral con que nada temos que ver. Chamáronnos de "independentistas radicales que pululan por nuestra facultad" cando a ALEM é radicalmente apolítica. E finalmente, a chama da ilusión converteuse nas cinzas da desesperanza.

Como dicía o poeta, a forza do noso amor non pode ser inútil, polo que o 18 de xaneiro de 2011, con folgos renovados, tivo lugar unha asemblea reconstituínte. En vez de moitos fomos poucos. En vez de discusións houbo acordos. En vez de incertidume houbo experiencia. Só unha cousa non mudou, a ilusión. A ilusión por unha facultade unida. A ilusión por un estudantado consciente. A ilusión de saber que a asemblea é o camiño a seguir.

Así, deamos un saúdo a Alberto como o Portavoz, a Jon Amil como o Coordenador executivo e a Montse como a Responsábel das finanzas. Tres cargos exixidos pola lei que non son máis que tres estudantes sen poder ningún, iguais ao resto de xente que veña a calquera das asembleas.

Agora, con novas forzas, animámosvos máis que nunca a participardes, a serdes vós quen decidades o voso futuro, a serdes vós os vosos propios representantes. Porque se non somos nós quen nos defendemos, quen o ha de facer por nós?

Bo Nadal!

2010-12-21T02:17:00.005+01:00

BO NADAL E FELIZ ANO NOVO!

O Apalpador, personaxe mítica do Nadal galego

Ola Gestal!

2010-12-16T02:02:00.010+01:00

Rematado o escrutinio das eleccións a decano, o resultado é:

Dr. Crespo: 74 votos
Dr. Gestal: 104 votos

Por tanto, o decano da Facultade de Medicina e Odontoloxía durante os vindeiros 4 anos será o Dr. Juan J. Gestal.

Aquí podedes ver dúas entrevistas que lle fixeron no canal CorreoTV (emisora local de Compostela), para coñecérdelo mellor:

Adeus Fraga!

2010-12-16T01:56:00.002+01:00

Hoxe son as eleccións ao decanato da facultade de Medicina e Odontoloxía, polo que ao final do día saberemos se o Dr. Crespo ou o Dr. Gestal ocupan o cargo. Mais esta entrada do blogue é para honrar ao decano que nos deixa despois de 8 anos connosco, o Dr. José María Fraga Bermúdez.

As súas últimas palabras no seu discurso de despedida (e non estou a brincar) foron: Como decís ahora, "Que la fuerza os acompañe". Aunque recordad que la fuerza siempre tiene un lado oscuro.

O perfecto mundo imperfecto (Escola de Menciñeiros)

2010-11-18T01:49:00.010+01:00

Xa non é o primeiro profesor, nin o último de paso, que se queixa da progresión nos malos resultados do MIR por parte dos alumnos da USC. Acaso esperan que esteamos nos primeiros postos desa marabillosa lista cando levan sen actualizar os temarios cousa de 10 anos? A proba tédela en que cando ides ao Barato polos apuntamentos do curso, case non hai variacións, e non quero imaxinar a de anos que deben levar por alí tendo en conta os cursos dos cales teñen certos exames. Serán mínimo uns 5 anos? Supoño que máis ou menos as datas aproxímanse.

Pois ben, de entre todas as súas marabillosas ideas, agora ocórreselles a bendita entre todas as demais de coller e dicir: Nas clínicas médico-cirúrxicas ademais de entregar as memorias e os cadernos, tedes que vos presentar ao exame e responder dunha forma aceptable, se non estades suspensos. E isto dino despois do comezo do curso, sen previo aviso e calculando estes pequenos cambios en reunións de transcurso máis que dubidoso en pequeno grupo, é dicir, con premeditación e aleivosía. En resumo, agora as nosas cualificacións das clínicas penderán do fío da nosa inspiración o día do exame, exame que consta duns supostos clínicos que non deixan de ser un exame teórico máis. Pregunta: Cal é a diferenza entre os casos clínicos que poñen no exame da clínica e as preguntas de Patoloxía Xeral de Quintela? A min que ma expliquen, porque ou son moi curtiña, ou non a aprecio.

Continúan a facer o que lles dá a puta gana e nós caladiños como putas preas. Caladiños e coas orelliñas ben baixiñas, non vaia ser que o coordinador de turno nos colla pía e nos vaia suspender. Ollo! Que estas materias teñen cousa duns 20 créditos, o que supón unha cuarta parte da nosa matrícula. Non importa! Apelemos á inspiración que nos transmita o espírito santo, porque está claro que as nosas aptitudes clínicas seguen a non ser importantes. E o día de mañá cando cheguemos a ter a nosa primeira garda os nosos adxuntos pretenderán que nos saibamos desenvolver adecuadamente ante os que serán os nosos pacientes. E responderemos e diremos: Mira, que a min nas clínicas, exixíanme que respondese a isto nun caso tipo test, e por descarte aínda ía sacando. Poderíasme sacar un exame parecido para atender este paciente?

Unha vez máis, viva o ensino médico. Estamos en 5º de carreira e aínda nin sabemos facer unha auscultación cardiopulmonar adecuada, a ver se con sorte o día de mañá conseguimos distinguir un ruído dun sopro ou un murmurio vesicular dunha sibilancia.

Escrito por Montse Fernández, estudante de Medicina

Novidades da biblioteca de Medicina

2010-11-16T01:46:00.004+01:00

- Novo tipo de empréstimo de fin de semana. Algúns dos libros que se atopan na sala de lectura, os cales aparecen identificados cunha marca verde no lombo, poderán ser levados para a casa a partir do mediodía das sextas feiras (venres) e terán que ser devoltos na seguinte segunda feira (luns) de mañá.

- Scanner, dispoñíbel para a dixitalización de documentos, no primeiro computador de uso público na hemeroteca (2ª planta da biblioteca).

Continuaremos a informar!

Pósters motivacionais II - Patoloxía

2010-11-10T02:14:00.005+01:00

Este póster está baseado en feitos reais e verídicos. Trátase da resposta literal dada na revisión do parcial de Patoloxía Xeral Médico-Cirúrxica do ano 2009.

Eleccións ao decanato: 16 de decembro

2010-11-10T01:40:00.005+01:00

Como moitas de vós saberedes, este ano son as eleccións ao decanato da facultade de Medicina. Como o actual decano, José María Fraga Bermúdez, xa non se pode presentar á reelección, teremos unha nova persoa no posto. Terán voto todas as persoas que fan parte da Xunta de Facultade, isto é, docentes de Medicina e unha representación de estudantes elixida democraticamente polo alumnado anualmente. Dado que as eleccións a representantes de estudantes serán con toda a previsión posteriores ás do decanato, serán as actuais representantes quen se encarguen de elevar a decisión estudantil e votar en consecuencia.

De momento non se sabe a xente que se vai candidatar ao posto (fóra dalgúns rumores), mais o que si sabemos son as datas chave do proceso:

-> 15 ao 29 de novembro: Presentación das candidaturas
-> 7 de decembro: Proclamación oficial das candidaturas
-> 16 de decembro: Xunta de Facultade extraordinaria onde se realizará a votación por maioría absoluta (máis da metade dos votos validamente emitidos)
-> 17 de decembro: Caso de ningunha candidatura gañar no día 16, realizarase unha segunda votación por maioría simpre (quen teña máis votos gaña)

Continuaremos a informar así que teñamos novos datos.

Pósters motivacionais I - Biofísica

2010-11-08T02:10:00.001+01:00

Desde a ALEM queremos apoiar a todos aqueles estudantes de Medicina que, nalgún momento, senten que están decaídos ou desenganados. Para iso, damos comezo á serie de Pósters Motivacionais para Estudantes de Medicina.